Pavlova
Þessi pavlova er svo bragðgóð og falleg, hún er fullkomin við sérstök tækifæri. Það er ótrúlega einfalt að búa til þessa tertu og virkilega skemmtilegt að skreyta hana. Ég man ekki hvar ég fann þessa uppskrift upphaflega en í fyrsta skiptið sem ég bjó hana til var handa vinkonu sem átti afmæli og hún elskar pavlovur.
Ég hélt alltaf að pavlova væri frá austur Evrópu en svo er víst ekki. Uppruni Pavlova er frá Ástralíu eða Nýja-Sjálandi og nafnið Pavlova er eftir rússneskri ballerínu sem hét Anna Pavlova.
Pavlova
Undirbúið plötu. Setjið bökunarpappír á plötu og teiknið hring, annan 22 cm og minni hring inn í, 13 cm. Hitið ofn í 120 gr. C
4 eggjahvítur
250 gr. sykur
1/4 tsk. salt
2 tsk. maizena-mjöl
1 tsk. hvítvínsedik
Bleikur matarlitur
Aðferð:
Setjið eggjahvítur í skál og byrjið að þeyta mjög rólega á meðan þið vigtið sykur.
Þegar aðeins froða er farin að myndast bætið þá í hraðann og setjið sykur og salt hægt og rólega saman við.
Bætið svo í hraðann jafnt og þétt alveg upp og þeytið þar til stíft og glansandi.
Bætið þá varlega saman við með sleif maizenamjöli og ediki.
Takið skeið og setjið marengs á hringinn á pappírinn.
Ef þið viljið lita hann, dýfið prjón í lit og búið til hringi efst í marengsinn svo það myndist marmaraáferð.
Setjið inn í ofn og bakið í 2 klst. Slökkvið á ofninum og takið út þegar ofninn er orðinn kaldur. Fínt að slökkva og geyma yfir nótt.
Ofan á:
4-5 dl rjómi
1 tsk. vanilludropar
2 msk. flórsykur
1 bakki fersk jarðarber
Aðferð:
Setjið kransinn á kökudisk.
Þeytið rjómann, setjið svo á lægstu stillingu og setjið vanilludropa og flórsykur við.
Skerið jarðarber í bita og hrærið með sleif saman við rjómann.
Setjið rjóma-jarðarberjablöndu á kransinn.
Skreytið að vild, mér finnst jólalegt að nota granatepli, rifsber, jafnvel hindber og bláber. Set nokkrar greinar af rósmarín (sem kemur út eins og greni) og svo dustað yfir með smá flórsykri.
Make it stand out
Elín Rún Sizemore
Íbúi á Eskifirði. Rafvirki og meistaranemi hjá Háskóla Íslands í heilsueflingu - og heimilisfræði
